Cuaird Liteartha

Fógra ó Fhoras na Gaeilge:

Cuaird Liteartha do Mhiontheangacha agus do Theangacha Mionlaigh san Eoraip

Is clár comhpháirtíochta é an tionscadal liteartha Focail Eile idir eagraíochtaí cultúrtha/teanga i réigiúin Eorpacha agus tá sé d’aidhm aige líonra de shocrúcháin chruthaitheacha a chruthú do scríbhneoirí Eorpacha i mionteangacha agus teangacha mionlaigh. Is iad na heagraíochtaí comhpháirtíochta:

⦁    Donostia Kultura agus San Sebastian 2016 (Tír na mBascach)
⦁    Foras na Gaeilge (Éire)
⦁    X-OP, malartán d’oibritheoirí agus de tháirgeoirí ealaíne (an tSlóivéin)
⦁    Fóram Óige na Mladi (an Mhacadóin)
⦁    Leeuwarde/Ljouwert 2018 (an Fhreaslainn).

Tá an chéim ullmhúcháin den tionscadal ar siúl faoi láthair agus beidh an tionscadal féin á reáchtáil le linn na tréimhse 2016-2019.

Is iad croíchuspóirí an tionscadail:

⦁    Cuidiú an litríocht a scríobhtar i dteangacha neamhfhorleathana agus mionlaigh a chur in iúl níos faide i gcéin.
⦁    Béim a chur ar thábhacht na héagsúlachta teanga.
⦁    Solas a chaitheamh ar an bpróiseas cruthaitheachta liteartha.
⦁    Aird a tharraingt ar théamaí sóisialta, saincheisteanna agus grúpaí sóisialta a bhaineann le mionteangacha.
⦁    An comhoibriú a chur chun cinn idir scríbhneoirí agus ealaíontóirí i litríocht i mionteangacha agus teangacha mionlaigh. 

Is iad na príomhchodanna den tionscadal:

⦁    Socrúcháin: Seo croí an tionscadail, atá bunaithe ar mhalartú scríbhneoirí idir régiúin éagsúla. Cuirfidh gach réigiún rannpháirteach dhá scríbhneoir le socrúchán ocht seachtaine a chur isteach in dhá réigiún comhpháirtíochta i ngach ceann de na trí bliana, agus fáilteoidh gach réigiún chomh maith roimh dhá scríbhneoir gach bliain ó réigiúin chomhpháirtíochta. Beidh 10 scríbhneoir ar fad ag glacadh páirte gach bliain.

⦁    Tionscadail chruthaitheacha liteartha: Le linn na socrúchán beidh na scríbhneoirí ag obair ar ábhair a phléann le téamaí, saincheisteanna agus grúpaí sóisialta a bhaineann le teangacha neamhfhorleathana, a mbeidh de thoradh orthu téacs liteartha a phléann leis na hábhair seo, ag coinneáil i gcónaí teagmháil agus comhoibriú leis an bpobal óstach agus ag caitheamh solais ar an bpróiseas cruthaitheach. Le cuidiú seo a bhaint amach glacfaidh na scríbhneoirí páirt i sraith tionscnamh le linn na socrúchán.  

⦁    Aistriúcháin: Mar a luadh cheana tá ar cheann de chuspóirí an tionscadail litríocht a cheaptar i dteangacha mionlaigh nó i mionteangacha a chothú agus comhoibriú a chur chun cinn idir scríbhneoirí. Aistreofar na téacsanna go léir a chruthófar le linn na socrúchán go teangacha na gcomhpháirtithe agus go Béarla. Mar gheall ar seo beimid in ann “focail eile” agus “focail daoine eile” a chomhroinnt.

⦁    Suíomh Gréasáin: Foilseofar na saothair a chruthófar sa tionscadal Beste Hitzak/Focail Eile, agus an próiseas cruthaitheach féin, ar shuíomh saindeartha. Beidh an suíomh seo ina ardán le hábhar an tionscadail a scaipeadh. 

Tá comhpháirtithe sna réigiúin eile ag obair cheana féin ar fhorbairt an tionscadail. Sa chéad chéim phoiblí lainseálfar comórtas, glao oscailte, leis na scríbhneoirí is oiriúnaí le páirt a ghlacadh sa tionscadal a roghnú. Tá critéir don chomórtas foilsithe ar an suíomh gréasáin.

Is mian linn gach scríbhneoir a spreagadh le páirt a ghlacadh sa chomórtas agus freagairt ar ár nglao oscailte. Is deis iontach é seo saothar liteartha a chruthú agus eolas a chur ar an bhfíorshaol i réigiún eile. Mar a luadh cheana, cónóidh na scríbhneoirí roghnaithe i réigiún eile ar feadh ocht seachtaine, le costais uile íoctha. Gheobhaidh siad luach saothair chomh maith.

Beidh níos mó socrúchán agus imeachtaí ann amach anseo, a fhógrófar ag an am cuí. Tabhair faoi deara go mbeidh na chéad socrúcháin do scríbhneoirí ann in earrach na bliana 2016.

Le haghaidh tuilleadh eolais cuir ríomhphost chuig focaileile@forasnagaeilge.ie.

Citywest, Satharn 31 Deireadh Fómhair

Beidh ollchruinniú ag Aontas na Scríbhneoirí Gaeilge i Citywest, Baile Átha Cliath maidin Dé Sathairn 9.30-11.00. 
Beidh fáilte roimh bhaill nua agus is féidir clárú leis an chisteoir ag an doras.

Aontas na Scríbhneoirí Gaeilge – ag cothú na cruthaitheachta

Ní gá go mbeadh saol an scríbhneora aonaránach. Bí páirteach linn sa chomrádaíocht a thagann as comhairle agus taithí a roinnt le chéile chun  saol an scríbhneora Gaeilge a éascú. 

 

Tá fáilte roimh gach scríbhneoir a shaothraíonn sa Ghaeilge in Aontas na Scríbhneoirí Gaeilge, a bunaíodh in 2015 le freastal ar na riachtanais éagsúla atá ag údair ó cheann ceann na tíre. Cuireann an tAontas roimhe comhoibriú le dreamanna eile le scríbhneoireacht na Gaeilge a fhorbairt agus a seasamh a ardú go náisiúnta agus go hidirnáisiúnta.

De réir a chéile, le do chuidiú, beidh muid in ann seirbhísí éagsúla a thairiscint: gréasán cumarsáide agus eolais a sholáthar, bunachair sonraí a choinneáil faoi dheiseanna maoinithe  agus faoi fhorbairt ghairmiúil. Déanann an tAontas ionadaíocht thar ceann na scríbhneoirí agus idirbheartaíocht le foilsitheoirí agus institiúidí cultúrtha éagsúla atá tábhachtach do shaothar an scríbhneora Gaeilge.  

Gréasán cumarsáide agus sóisialta do scríbhneoirí

Eolas faoi dheiseanna maoinithe – sparánachtaí, scéimeanna cónaithe srl 

Rátaí íocaíochta cuí agus cearta a bhaint amach do scríbhneoirí

Lacáistí do bhaill ar chúrsaí agus ar imeachtaí éagsúla

Ardán a chur ar fáil do scríbhneoirí a saothar a léamh agus a phlé

Forbairt suíomh idirlín do bhaill

Idirbheartaíocht le heagrais agus institiúidí 

Réiteach plécháipéisí agus aighneachtaí

Tá aighneachtaí scríofa agus curtha i láthair RTÉ agus Foras na Gaeilge agus cáipéisí eile á réiteach do TG4, Oireachtas na Gaeilge agus do na Comhairlí Ealaíon. Tá ról anois againn i bhfeidhmiú scéimeanna éagsúla, ar nós ócáidí Leabharlanna, a thugann deiseanna do scríbhneoirí dul os comhair an phobail.

Tá an tAontas rannpháirteach in Áras Scríbhneoirí na hÉireann agus lacáistí ar fáil ag na baill do chúrsaí agus imeachtaí eile ansin agus cead cur isteach ar sparánacht Jack Harte in Ionad Tyrone Guthrie. Le breis tacaíochta agus comhoibriú leis na heagrais eile i ngort na litríochta agus i saol na Gaeilge, beidh muid ag cur leis na buntáistí ballraíochta agus leis na seirbhísí a chuireann an tAontas ar fáil.

Bíonn ollchruinniú ann ceithre huaire sa bhliain, a thugann deis do na baill ábhair éagsúla a bhaineann le saol an scríbhneora a phlé agus tuairimí na scríbhneoirí a chur os comhair lucht riaracháin  agus maoinithe i saol na litríochta. Tugtar ardán d’údair saothar nua a léamh go poiblí agus saothar litríochta a phlé go neamhfhoirmeálta.

Tugann Aontas na Scríbhneoirí Gaeilge  cuireadh duitse a bheith páirteach san obair seo, is cuma cén cineál scríbhneora tú, úrnua nó seanbhunaithe, ag scríobh don chló nó don scáileán, ag plé le ficsean nó neamhfhicsean nó ag scríobh aistí nó scéalta do pháistí. Is féidir linn a bheith ag cuidiú agus ag foghlaim óna chéile. Ní neart go cur le chéile. 

 

Duais Filíochta Aurivo/North West Words/Ealaín na Gaeltachta 2015

Micheál Mac Aoidh (Ealain na Gaeltachta) -Breid Lindsay & Gary O'Donnell (Donegal Creameries) Nick Griffiths & Annmarie Gallagher (North West Words)

Duais Filíochta Aurivo 2015, i gcomhar le North West Words agus Ealaín na Gaeltachta

Duais €250 agus Gradam Filíochta Aurivo le bronnadh ar an mbuaiteoir



Treoirlínte agus rialacha an chomórtais

Ní foláir gach iarracht a bheith ina saothar úrnua de chuid an iarratasóra féin agus ní foláir nár fhoilsíodh cheana é ach oiread; bíodh sna meáin nó féin-fhoilsithe. Ní ghlacfar le dánta a bhain gradam amach i gcomórtas roimhe seo. Ní mór go mbeidh an t- iarratasóir níos aosta ná 18 bliain d’aois.

Trí dhánta an t-uasmhéid a ghlacfar ó gach iarratasóir.

Seol d’iarratas chugainn agus cur litir clúdach leis. Bíodh d’ainm, sloinne, seoladh agus uimhir ghutháin agus/nó seoladh ríomhphoist ar an litir clúdach sin, mar aon leis teidil na ndánta. Ná chuir d’ainm nó aon shonraí pearsanta eile ar an leathanach/leathanaigh atá na dánta scríofa orthu.
Caithfear na dánta a bheith faighte roimh an spriocdháta. Sé sin an Aoine 27 Samhain, 2015

Gearrfar táille €5 ar gach iarratas (uasmhéad 3 dhán). Eagraíocht neamhbhrabach is ea North West Words agus de dheasca sin, rachaidh an airgead a bhaileofar i dtreo na gcostas a bhaineann le riarachán an chomórtais. Ní íocfar táille leis an scríbhneoir.

Níl cead aon leasuithe a dhéanamh tar-éis do na hiarratais a bheith déanta. Ní seolfar na hiarratais ar ais chuig an iarratasóir.

Is é Seán Tadhg Ó Gairbhe moltóir an chomórtais i mbliana. Seasann gach rogha agus cinnidh a dhéanann na moltóirí agus ní cheadfar aon teagmháil nó chumarsáid leo maidir le cinnidh an chomórtais. Cuirfear amach as an iomaíocht aon iarratasóir a dhéanann iarracht teagmháil a dhéanamh leis na moltóirí.

Roghnófar gearrliosta ar an 21/22 Nollaig, 2015. Foilseofar an gearrliosta sin ar leathanach Facebook North West Words agus ar chlár fógraí Chafé Blend, Leitir Ceanainn. Reáchtálfar babhta ceannais an chomórtais i gCafé Blend, Leitir Ceanainn, Co. Dhún na nGall ar an Déardaoin 28 Éanair, 2016; áit a fhógrófar an buaiteoir agus a bhronnfar na nduaiseanna. Cuirfear an buaiteoir ar an eolas roimh an dáta sin.

Má ndéantar iarratas, glactar leis go nglacann an t-iarrasóir le rialacha agus coinníollacha an chomórtais.

Íocaíocht: Paypal ( gabh chuig http://northwestwords.com/ ), nó seic nó ordú poist.ordú airgid.

Le haghaidh tuilleadh eolais is féidir dul i dteagmháil le Micheál Mac Aoidh ag 074 9558025.

Ciorcal Scríbhneoirí Bhaile Átha Cliath

Ar an chéad lá de Dheireadh Fómhair a bheidh an chéad teacht le chéile ag Ciorcal Scríbhneoirí Bhaile Átha Cliath, fóram nua a thabharfaidh deis do scríbhneoirí cruthaitheacha saothar nua a chur i láthair a chéile agus a phlé. 

·         Cé a bheas ann? Filí agus scríbhneoirí próis de gach cineál, cuid acu ar foilsíodh saothar leo cheana, cuid eile nár fhoilsigh aon rud go dtí seo.

·         Cén modh oibre atá ann? Iarrtar ar údair cóipeanna clóite dá saothar a thabhairt leo le scaipeadh ar na rannpháirtithe eile. Beidh timpeall deich nóiméad ag gach duine dán nó sliocht a léamh os ard sula dtosóidh an plé. Conas a chuaigh sé i bhfeidhm ar na héisteoirí? An bhfuil moltaí ann chun feabhas a chur air?

·         Cén t-am? 7.30pm, Déardaoin, 1 Deireadh Fómhair 2015. 

·         Cén áit? Áras Chonradh na Gaeilge, 6 Sráid Fhearchair, BÁC 2.

Teagmháil: Antain Mac Lochlainn

Ceardlann

CEARDLANN NÁISIÚNTA

AN GEARRSCÉAL AGUS AN SPLANCSCÉAL

CLÓ IAR-CHONNACHT

 

Dáta: Dé Sathairn, 10 Deireadh Fómhair 2015

 

Ionad: Áras na Scríbhneoirí, 19 Cearnóg Pharnell, Baile Átha Cliath

Á heagrú i gcomhar le IMRAM agus Áras na Scríbhneoirí

 

Stiúrthóirí na Ceardlainne: Micheál Ó Conghaile agus Micheál Ó Ruairc

  

Beidh an cheardlann seo dírithe den chuid is mó ar scríbhneoirí óga/nua nach bhfuil aon leabhar foilsithe fós acu ach a léiríonn cumas scríbhneoireachta sa ghearrscéal nó sa splancfhicsean. Tabharfar áit ar an gceardlann freisin áfach do dhornán scríbhneoirí aitheanta, rud a rachaidh chun leasa na scríbhneoirí óga agus na scríbhneoirí aitheanta araon. Tugtar cuireadh do ghearrscéalaithe ar mhaith leo a bheith páirteach sa cheardlann gearrscéal nó cupla splancscéal dá gcuid a sheoladh chuig Stiúrthóir CIC, Micheál Ó Conghaile ag moccic@eircom.net  ROIMH an 24 Meán Fómhair 2015.

Roghnófar na saothair is feiliúnaí agus déanfar iad a phlé agus a mheas ag an gceardlann. Seolfar saothar gach scríbhneora chuig gach iarrthóir (a bheidh ag freastal ar an gceardlann) roimh ré ionas go mbeidh deis acu iad a léamh. Tríd an modh oibre seo beidh na hiarrthóirí ar fad in ann páirt ghníomhach a ghlacadh sa cheardlann, agus foghlaim ó laigí agus ó bhuanna shaothar a chéile. Beidh áit d’ochtar ar a mhéid ar an gceardlann. Níl aon táille i gceist don cheardlann seo ach beidh iarrthóirí freagrach as a gcuid costas taistil féin agus lóistín sa chás go mbeadh a leithéid i gceist.

 

Tuilleadh eolais:

Micheál Ó Conghaile nó Bridget Bhreathnach

Cló Iar-Chonnacht

Indreabhán

Conamara

Co. na Gaillimhe

Guthán: (091) 593307  Facs: (091) 593362  Ríomhphost: moccic@eircom.net

Tá an cheardlann seo á heagrú le tacaíocht ón gComhairle Ealaíon 

 

Ról na nEalaíon sa Phleanáil Teanga

17ú, 18ú Meán Fómhair

Na Forbacha

Co. na Gaillimhe

Sparántacht Jack Harte

Spriocdháta do Sparántacht Jack Harte ag druidim linn, 25 Meán Fómhair.

Gach eolas ANSEO